మందు తాగండోయ్ ! బాబులూ !!

కరువొచ్చింది. పంటలు ఎండిపోయాయి.
వరదొచ్చింది. పంటలు కొట్టుకుపోయాయి.
పప్పుల ధరలు పెరిగిపోయాయి.
బియ్యం కనుమరుగై పోతుందిట.
రోగాలు విజృంభిస్తున్నాయి.
ఆత్మహత్యలు పెరిగిపోతున్నాయి.
వీటన్నిటికీ పరిష్కారం ఏమిటి ?
ప్రభుత్వం బుర్ర బ్రద్దలగొట్టుకుని పరిష్కారం ఆలోచించింది.
అదే ' మందు తాగండోయ్ ! బాబులూ !! ' నినాదం.
అంతే ! ప్రభుత్వాదికారులందరు ఇంటింటి ప్రచారం మొదలుపెట్టారు.
ఆ రకంగా ప్రభుత్వోద్యోగులందరికీ పని దొరికింది.
అడుగడుగునా కొత్త కొత్త మందు దుకాణాలు వెలిసాయి.
ఆ రకంగా నిరుద్యోగ సమస్య కొంత వరకు తగ్గింది.
సంపాదనంతా సారాకు పోతుంటే కుటుంబమంతా ఆకలితో చచ్చిపోతోంది.
మందు కొట్టిన వాహనాలు రోడ్డు మీద కాకుండా జనాల మీదుగా వెడుతున్నాయి.
ఆ రకంగా జనాభా సమస్య పరిష్కారం అవుతోంది.
అన్ని బాధలు మర్చిపోయి ప్రజలు హాయిగా మత్తులో మునిగిపోతున్నారు.
ఆ రకంగా ప్రభుత్వం పైన ఒత్తిడి తగ్గిపోయింది.
అబ్బో ! ఎన్ని సమస్యలు పరిష్కారమయ్యాయి !
ఇంతకన్నా ప్రజా సంక్షేమాన్ని పట్టించుకునే ప్రభుత్వముందా !!