Sunday, October 4, 2009

జల ప్రళయ సుందర దృశ్యం

కృష్ణవేణి కరాళ నృత్యం చేస్తోంది. భారీగా ఆస్తి, ప్రాణ నష్టాలు చవిచూసిన కర్నూలు ఇప్పుడిప్పుడే కోలుకుంటోంది. గడగడలాడించిన శ్రీశైలం కొంత ఉపశమనాన్ని కలిగిస్తోంది. నాగార్జున సాగర్ దగ్గర ఉధృతి ఇంకా తగ్గలేదు. కృష్ణా, గుంటూరు జిల్లాల్ని ప్రకాశం బారేజి వణికిస్తోంది. అయిదు జిల్లాల ప్రజలు కృష్ణమ్మ ఆగ్రహాన్ని చవిచూస్తున్నారు. ఎప్పుడూ ప్రశాంతంగా, గంభీరంగా ప్రవహించే కృష్ణలో దాగునిఉన్న ఉగ్రరూపాన్ని ప్రాంత ప్రజలు ఇప్పుడు చూస్తున్నారు. దాని ఫలితాల్నివిషాదభరిత పరిస్థితుల్లో అనుభవిస్తున్నారు. రాష్ట్ర విద్యుత్తు అవసరాలలో సింహ భాగం తీరుస్తున్న విజయవాడ థెర్మల్ పవర్ స్టేషన్ నీట మునిగే ప్రమాదంలో ఉంది. ఇదే జరిగితే రాష్ట్రంలో చాలా భాగం అంధకారంలో మునిగిపోతుంది. తెల్లవారేలోగా ఏం జరుగుతుందో ఉహించలేని పరిస్థితి.
ప్రస్తుతం కృష్ణమ్మ పరవళ్ళలో విలయమే కనిపిస్తోంది. భయానక, భీభత్సాలే కానీ ఇందులో అందమైన, సుందరమైన దృశ్యం ఎలా కనబడుతుంది ?
కానీ ఒక తెలుగు టీవీ ఛానల్ కి నాగార్జున సాగర్ లో ఉప్పొంగుతున్న కృష్ణ లో సుందర దృశ్యమే కనబడుతోంది. కృష్ణ విలయ తాండవాన్ని చూడడానికి వచ్చిన సందర్శకులతో నాగార్జున సాగర్ కిక్కిరిసిపోయింది. అక్కడ రహదారుల్లో ట్రాఫిక్ జామ్ అయింది. ఇది సహజంగానే అక్కడ డ్యాము రక్షణ విధుల్లో తలమునకలైన సిబ్బందికి ఆటంకం కలిగిస్తుంది. అత్యవసర పరిస్థితుల్లో వారి విధులకు ఆటంకం కలిగిస్తే జరిగే నష్టం గురించి మీడియాలో ఉన్నవారు ఉహించలేరా ? విషాదకర దృశ్యాన్ని సుందర దృశ్యంగా వర్ణించడం ప్రజల్ని ప్రభావితం చేయగలిగే శక్తి ఉన్న మీడియా వారికి సబబేనా ? వర్ణన వల్ల మరింతమందికి ఆసక్తి కలిగి సందర్శన కోసం బయిల్దేరి తాము ప్రమాదంలో చిక్కుకోవడమే కాక పరోక్షంగా భయంకరమైన విపత్తుకి కారణం కారా ? ఛానల్ వారు తమ పాండిత్య ప్రదర్శనలో చూపిస్తున్న ఉత్సాహం, బాధితులకు సహాయం అందించే దిశగా ప్రజల్ని ప్రేరేపించేదిగా ఉండాలిగానీ మరింతమంది బాధితుల్ని పెంచేదిగా మాత్రం ఉండకూడదు. నిజానికి విపత్కర పరిస్థితిలో మీడియా పోషిస్తున్న పాత్ర అభినందనీయంగానే ఉంది. అందులో సందేహం లేదు. అయితే అత్యుత్సాహం పనికిరాదు. ప్రజల్ని సరైన దిశకు మరల్చే ప్రయత్నం చెయ్యాలి. ఇలాంటివి చాలా చిన్న విషయాలుగా కనబడినా ప్రజల్లో మీడియా కలిగించే ప్రభావం ఎక్కువగానే ఉంటుంది. అందుకే మీడియా సంయమనం పాటించాలి. తప్పదు. సమాజం పట్ల తమ బాధ్య గుర్తించి తమ ప్రతి రిపోర్ట్ ను జాగ్రత్తగా ఆలోచించి ఇవ్వవలసి వుంటుంది.

No comments:

Related Posts Plugin for WordPress, Blogger...

ప్రాచుర్యం