బళ్ళైన ఓడలు

ఒకప్పుడు హీరోయిన్ గా ఒక వెలుగు వెలిగిన సీనియర్ తారామణి అంజలీదేవి.  వంద చిత్రాలు పూర్తిచేశాక రిటైర్ అయిపోవాలనుకున్నారు. ఆ కారణంగా కొంతకాలం సినిమాలను అంగీకరించలేదు. ఇది 1960 నాటి మాట. అప్పట్నుంచీ ఆమె చాలా కష్టాలను చవిచూశారు. సుమారు పద్దెమినిది సంవత్సరాలు కష్టపడి సంపాదించిన సంపదంతా ఆదాయపు పన్ను బకాయి క్రింద పోయింది. వ్యాపార ప్రయత్నం చేస్తే బెడిసికొట్టింది. అప్పులు తెచ్చి అశోక్ కుమార్, మనోజ్ కుమార్, వైజయంతిమాల తారాగణంగా ' ఫూలోం సే సజో ' అనే హిందీ చిత్రం నిర్మిస్తే దురదృష్టవశాత్తూ అది పరాజయం పాలయ్యింది. ఫైనాన్షియర్స్ వత్తిడి అధికమైంది. ఆమె ఆస్తిపాస్తుల్ని కోర్టు స్వాధీనం చేసుకుని వేలం వేసారు. ఇదంతా చలనచిత్ర పరిశ్రమ కళ్ళారా చూసింది. రకరకాల పుకార్లు షికారు చేసాయి. అంజలికి మతి చెడిందన్నారు. ఎక్కడికో పారిపోయిందన్నారు. ఆత్మహత్యా ప్రయత్నం చేసిందన్నారు.

అంజలీదేవి సత్య సాయిబాబాకు భక్తురాలని అందరికీ తెలిసిన విషయమే ! ఆ సమయంలో ఆమె సత్య సాయిబాబా దర్శనం చేసుకుంది. ఆయన ' ఇది నీకు పరీక్షా సమయం. ధైర్యంతో ఎదుర్కో. చీకటి పోయి వెన్నెల వస్తుంది ' అని ధైర్యం చెప్పారు. ఆ తర్వాత ఆమెకు ఒక తమిళ చిత్రంలో నటించే అవకాశం వచ్చింది. ' అక్కడనుంచి ఆ భగవానుని దీవెనతోనే క్రమ క్రమంగా కోలుకున్నాను' అన్నారామె. 

ఓడలు బళ్ళైన కష్టకాలంలో ధైర్యమిచ్చే మాటలే కొండంత అండనిస్తాయి. అందుకే అంజలీదేవికి సత్య సాయిబాబా మీద అంత గురి కుదిరిందేమో !   

Vol. No. 02 Pub. No. 191