Tuesday, May 4, 2010

తెలుగు జిప్సీ పాట

 కృష్ణ - ఆ పేరు చెబితే సాహసం గుర్తుకొస్తుంది. తెలుగు చలన చిత్ర చరిత్రలో ఆయన చేసినన్ని సాహసాలు ఇంకెవరూ చెయ్యలేదేమో ! తొలి పూర్తి నిడివి సినిమా స్కోప్ వర్ణ చిత్రం ' అల్లూరి సీతారామరాజు ', తొలి 70 mm చిత్రం ' సింహాసనం ' ......... ఇలా ఎన్నో !

కృష్ణ 1971 లో నిర్మించిన ' మోసగాళ్ళకు మోసగాడు ' చిత్రం తెలుగు ప్రేక్షకులకు ఓ అద్భుతం. అప్పట్లో కేవలం పెద్ద నగరాల్లో మాత్రమే ఆంగ్ల చిత్రాలు విడుదలవుతూ వుండేవి. అక్కడి ప్రేక్షకులకు మాత్రమే ఆంగ్ల కౌబాయ్ చిత్రాలు పరిచయం. మిగిలిన ప్రాంతాల ప్రేక్షకులకు అంతగా పరిచయం వుండేవి కాదు. కొత్త రకం ఆహార్యాలు. కొత్త రకం సెట్టింగ్ లూ, కొత్త రకం దుస్తులు, కొత్త రకం సంగీతం, గుర్రాలు, ఎడారులు, చేజింగ్ లూ.....ఇలా ఎప్పుడూ తెలుగు తెర మీద చూసి వుండని  ఒక కొత్త తరహా చిత్రాన్ని చూసి ఆంధ్ర ప్రేక్షకులు విరగబడ్డారు.

' మోసగాళ్ళకు మోసగాడు ' చిత్ర కథా, కథనంలో అంతకుముందు ఆంగ్లంలో వచ్చిన సూపర్ హిట్ చిత్రం  ' మెకన్నాస్ గోల్డ్ ' చిత్రంతో చాలా దగ్గర పోలికలున్నాయి. ఒక రకంగా తెలుగు చిత్రం కూడా ఏదో హాలీవుడ్ చిత్రం చూస్తున్నట్లుంటుంది. విచిత్రమేమిటంటే ' మోసగాళ్ళకు మోసగాడు ' చిత్రాన్ని ఆంగ్లంలో  ' ది ట్రెజర్ ' పేరుతో డబ్ చేసి విదేశాలలో విడుదల చేస్తే ఆది కూడా హిట్ అయింది. అప్పట్లో తెలుగు చిత్రాలకు విదేశాల్లో మార్కెట్ లేదు. సి. డి. లు, డి. వి. డి.లు అసలే లేవు. ఈ ఆంగ్ల చిత్రంలో పాటలుండవు. 

' ది ట్రెజర్ ' చిత్రం గ్రీక్ దేశంలో ప్రదర్శించే సమయంలో ఆ దేశానికి చెందిన ఓ పంపిణీదారునికి ఆ చిత్రం నచ్చి తమ భాషలోకి అనువాదం చేస్తే బాగుంటుందనిపించింది.  సంప్రదింపులు జరిగాయి. తెలుగు చిత్రంలో రాజసులోచన ఆహార్యం, ఆవిడపై చిత్రీకరించిన పాట కూడా అతనికి చాలా నచ్చాయి. ఆంగ్ల చిత్రంలో ఆ పాట లేకపోయినా గ్రీక్ లో ఆ పాటను కలుపుకుంటానన్నాడు. మరి పాట కూడా గ్రీక్ భాషలోకి అనువాదం చేస్తారా అంటే అవసరం లేదు తెలుగులోనే ఉంచేస్తానన్నాడట. మీ ప్రేక్షకులకు సాహిత్యం అర్థం కాక ఇబ్బంది అవుతుందేమోనంటే......

" ఏం ఫర్వాలేదు. ఆ నటి ఈ చిత్రంలో వేసింది జిప్సీ వేషం కదా ! ఆ పాట జిప్సీ భాషలో వుంది అనుకుంటారు " అన్నాడట ఆ గ్రీకు పంపిణీదారుడు. అర్థం కాని భాషను ఆ రకంగా సరిపెట్టేసుకున్నాడన్న మాట. 
 



Vol. No. 01 Pub. No. 281

5 comments:

జయ said...

బాగుందండి రావ్ గారు. ఈ సినిమా ఇంగ్లీష్ లో రిలీజ్ అయిందని తెలుసు కాని ఈ జిప్సీ పాట సంగతి తెలియదు. ఎంతైనా గ్రీకులు కళాకారులే కదా:)

Anonymous said...

ohh intundaa.. asalu telidu naaku...

SRRao said...

* జయ గారూ !
* నెలబాలుడు గారూ !

ధన్యవాదాలు

Rajendra Devarapalli said...

my all time favorite and i watched the movie 100+ times and will watch another 100+ times.thanks a lot :)

SRRao said...

రాజేంద్రకుమార్ గారూ !
ధన్యవాదాలు

Related Posts Plugin for WordPress, Blogger...

ప్రాచుర్యం