విజయా చందమామ

 తెలుగు వారి విజయ పతాకం
విజయావారి చిత్రాల విజయం

రాయలసీమలోని ఓ కుగ్రామం ఈ విజయానికి మూలం
కడప జిల్లా పులివెందుల తాలూకా ఎద్దులయ్యగారి కొత్తపల్లి లో 1912 వ సంవత్సరంలో నాగిరెడ్డి గారి జననంతో బీజం పడింది.

తల్లిదండ్రుల, మాతామహుల  పెంపకంలో వ్యవసాయపనులతో బాటు చదువు.
గాంధీజీ పిలుపుతో చదువు త్యాగం చేసి స్వాతంత్ర్య ఉద్యమంలో చేరిక

తండ్రి గారి వ్యాపారం ఉల్లిపాయలు విదేశాలకు ఎగుమతి
అన్నగారు నరసింహారెడ్డి ( బి. ఎన్. రెడ్డి ) అప్పటికే చిత్రరంగ ప్రవేశం 
తండ్రి గారి కోపానికి ఫలితం నాగిరెడ్డిగారి మద్రాస్ నగర ప్రవేశం
అన్నగారి చిత్ర నిర్మాణ సంస్థలో పబ్లిసిటీ పనుల పర్యవేక్షణ బాధ్యత
........ ఇదీ ఆయన జీవన ప్రయాణంలోని తొలి ఘట్టాలు

వాహినీ సంస్థ సిబ్బందికి హోటల్ నుంచి ఇడ్లీలు తీసుకొచ్చే పని
వందేమాతరం  హీరో నాగయ్యగారిని సైకిల్ మీద స్టూడియోకి చేర్చే పని
.... ఇలా ఒకటేమిటి ? చిత్ర నిర్మాణానికి అవసరమైన అన్ని పనులు చేసి రాటుదేలారు నాగిరెడ్డి
పుట్టుకతో ఐశ్వర్యవంతుడు, యజమాని సోదరుడు అయినా పని నేర్చుకునేటపుడు పనివాడే !

 చక్రపాణి గారి తోడ్పాటుతో 1947 లో పిల్లలకోసం ' చందమామ ' పత్రిక ప్రారంభించారు నాగిరెడ్డి
శారీరికంగా వయసు పెరిగినా ' చందమామ ' విషయంలో మాత్రం అందరికీ ఆ పెరుగుదల ఆగిపోయింది
పిల్లల పత్రికయినా పెద్దలకు కూడా ప్రీతిపాత్రమయింది నింగి దిగివచ్చిన ' చందమామ '
తరతరాలుగా తెలుగువారందరి మదిలోను మిగిలిన అందమైన మధురానుభూతి 'చందమామ'  



కఠోర దీక్షే ఆయన్ని అడుగుపెట్టిన అన్ని రంగాలలో విజయుణ్ణి చేసింది
అర్జునుడు విజయుడై ఆయన్ని చిత్ర నిర్మాణం వైపు నడిపాడు
ఆంజనేయుడు ఆయనకు అండగా నిలిచి పతాకంపై నిలిచాడు
దానితో 1949 వ సంవత్సరంలో విజయా సంస్థ ఆవిర్భవించింది
'షావుకారు' తో మొదలుపెట్టి ఆరోగ్యకరమైన చిత్రాలెన్నిటినో అందించింది
తెలుగుదనం నిండిన చిత్రాలతో తెలుగు వారికి గర్వపడే అవకాశాన్నిచ్చింది
వ్యాపారం పేరుతో వెకిలిదనాన్ని, హింసను, ఆశ్లీలతను నింపి ఆత్మవంచన చేసుకోలేదు 
అయినా విజయావారి చిత్రాలే ఇప్పటికీ వ్యాపారపరంగా విజయకేతనం ఎగుర వేస్తున్నాయి 
విజయావారి చిత్రాలు మాత్రమే తెలుగువారందిరినీ ఇప్పటికీ, ఎప్పటికీ అలరించే చిత్రాలేమో !

" ప్రేక్షకులకు వినోదంతో బాటు, మంచి  విలువలను కూడా అందించాలన్నదే నా తాపత్రయం "  
అనుకోగలిగిన నాగిరెడ్డి గారి లాంటి నిర్మాత మళ్ళీ తెలుగు ప్రేక్షకులకు దొరుకుతాడా ?
అందరాని ' చందమామ ' ను మనందరికీ అందించి తరతరాలుగా అలరించిన బొమ్మిరెడ్డి నాగిరెడ్డి గారి లాంటి ప్రచురణకర్త మళ్ళీ తెలుగు పాఠకులకు దొరుకుతాడా ?

తెలుగు వారి ' విజయా చందమామ ' నాగిరెడ్డి గారి జన్మదినం సందర్భంగా స్మృత్యంజలి

గత సంవత్సరం జన్మదిన సందర్భంగా నాగిరెడ్డి గారిపై రూపొందించిన చిత్ర నీరాజనం ఈ క్రింది లింక్ లో .................. 
 
http://sirakadambam.blogspot.com/2009/12/blog-post_02.html

అనుబంధం :

విజయావారి చందమామ గురించి మాధురి గారు అందజేసిన సమాచారం -

విజయావారి చిత్రాలెన్నిటికో కళా దర్శకత్వం నెరిపిన కళాధర్ గారిని ఆవిడ ఇటీవల కలవడం జరిగింది. అప్పటి విషయాలు       గుర్తుచేసుకుంటూ ఆయన చెప్పిన విషయం.                                                                                                
విజయావారి చిత్రాల్లో తప్పనిసరిగా కనిపించే చందమామ అంత అందంగా ఎలాకనబడుతుందో అప్పట్లో అందరికీ మిస్టరీగా         ఉండేది. కళాధర్ గారి కళా నైపుణ్యం, మార్కస్ బార్ట్లే గారి చాయాగ్రహణ ప్రతిభకు నిదర్శనం విజయావారి చందమామ. ఆ         చందమామ వెనుక రహస్యాన్ని తెలుసుకోవడానికి అప్పట్లో అమెరికా నుండి కొంతమంది ప్రత్యేకంగా వచ్చినట్లు కళాధర్ గారు    చెప్పారు. తెలుగు చిత్ర పరిశ్రమ గర్వంగా చెప్పుకునే కొన్ని విషయాలు మరుగున పడినా ఇలా మాధురిగారి లాంటి వారి          పరిశోధన వలన బయిట కొస్తే చరిత్రకెక్కుతాయి. భవిష్యత్తు తరాలకు ఈ సంపద చేరుతుంది.                                         

Vol. No. 02 Pub. No. 072

కార్తీక సంతర్పణ

కార్తీక మాసం విశిష్టమైనది. మనలో ఆథ్యాత్మికత్వం పెంపొందించడంతో బాటు మానవ సంబంధాలు మెరుగు పడడానికి, స్నేహ సంబంధాలు వెల్లి విరియడానికి దోహదపడుతుంది. శారీక ఆరోగ్యాన్నిచ్చే ఉపవాసాలు, సముద్ర - నదీ స్నానాలు మొదలైనవి ఆచరించడం, వన భోజనాలు, సామూహిక సంతర్పణలు వంటి వాటి వలన మానసికోల్లాసం కూడా కలుగుతుంది.

ఈ సంతర్పణల గురించిన చిన్ననాటి జ్ఞాపకాలను స్వ ' గతం ' - 2 పేజీని క్లిక్ చేసి చదవండి. 

 Vol. No. 02 Pub. No. 071

పూలమ్మిన చోట....

 పూలమ్మిన చోట కట్టెలమ్మాల్సిన పరిస్థితి వస్తే .......... ఉహించడం కష్టం.
 అప్పుడప్పుడు కొందరి జీవితాల్లోనైనా ఈ అనుభవం ఎదురవుతూ వుంటుంది  బళ్ళు ఓడలవుతాయి. ఓడలు బళ్ళవుతాయి. ఈ సృష్టిలో ఇది సహజం. విధి ఆడే ఆటలో అందరూ పావులే !

చలన చిత్రసీమలో ఇలాంటి చిత్రవిచిత్రాలెన్నో కనిపిస్తాయి. తళుకు బెళుకులతో మురిపించే చలన చిత్రరంగంలో కొందరు ప్రముఖులకు ఇది అనుభవైకవేద్యమే ! భారత దేశంలో చలన చిత్ర రంగ పితామహుడు ఎవరు అనడిగితే వెంటనే దాదా సాహెబ్ ఫాల్కే అని చెప్పలేని వారెవరూ వుండరేమో ! ఆయన ఎంతటి కీర్తిప్రతిష్టలు ఆర్జించారో ప్రత్యేకంగా చెప్పనక్కర్లేదు. జాతీయ స్థాయిలో అత్యుత్తమ చలన చిత్ర పురస్కారం దాదా సాహెబ్ ఫాల్కే పేరనే వుంది. ఈ మధ్యనే మన తెలుగు మూవీ మొఘల్ రామానాయుడు గారు ఆ పురస్కారాన్ని అందుకున్న విషయం తెలుగు వారందరికీ తెలుసు.
అంతటి గొప్ప వ్యక్తి ఆర్జించి తన వారసులకు ఇచ్చినవి కీర్తి ప్రతిష్టలే కానీ ధన ధాన్యరాశులు కావు. దానికి తార్కాణం దాదా సాహెబ్ ఫాల్కే గారి ఏకైక కుమారుడు కొంతకాలం క్రితం వరకూ ముంబై వీధుల్లో తిరుగుతూ బ్రతుకుతెరువు కోసం అగరుబత్తిలు అమ్ముకుంటూ జీవనం సాగించారు. ఈ విషయం చాలామందికి తెలియదు కూడా !

మన తెలుగు చిత్రసీమలో హాస్య నటులకు స్టార్ డం తెచ్చిపెట్టిన నటుడు కస్తూరి శివరావు. ఆయన చిత్రసీమలో ప్రవేశించక ముందు హార్మోనియం, తబలా మొదలైన సంగీత వాయిద్యాలు వాయించేవారు. మూకీ సినిమాలకు అప్పట్లో ప్రతీ థియేటర్ లోను వ్యాఖ్యాతలుండేవారు. శివరావు గారు కూడా అలా చాలా మూకీ సినిమాలకు వ్యాఖ్యానం చెప్పేవారు. సినిమా  ప్రొజెక్టర్ ఆపరేటర్ గా కూడా పని చేశారు. చిత్రరంగంలో ప్రవేశించి ' గుణసుందరి కథ ' చిత్రంతో తారాపథానికి చేరారు. ఒక వెలుగు వెలిగారు. ఫిలిం డిస్ట్రిబ్యూటర్ గా, నిర్మాతగా రాణించారు. ఆ రోజుల్లో సమాజంలో బాగా ధనవంతుల వద్ద మాత్రమే ఉండే ' బ్యూక్ ' కారు ఆయన దగ్గర ఉండేది. దాన్ని బట్టి ఆయన అప్పట్లో ఎంతటి ఉచ్చ స్థాయిలో వుండేవారో అర్థం చేసుకోవచ్చు.
అయితే రోజులేప్పుడూ ఒకేలా వుండవు. అంతటి స్థాయి నుంచి ఆయన పతనం ప్రారంభమై చివరిరోజుల్లో దుర్భర దారిద్యం అనుభవించారు. అంత్యక్రియలకు చందాలు వేసుకోవాల్సిన పరిస్థితి.
ఆయన నిర్మించి దర్శకత్వం వహించిన ' పరమానందయ్య శిష్యుల కథ ' చిత్రం నిర్మాణ దశలో వుండగా జరిగిన ఓ తమాషా సంఘటన. ఓ రోజు ఓ సన్నివేశంలో నటించడానికి గాడిద కావాల్సి వచ్చింది. సరే .... గాడిదను తీసుకొచ్చారు. సరిగ్గా ' టేక్ ' చేసే సమయానికి ఆది కాస్తా హాయిగా పడుకుంది. దాని శిక్షకుడు ఎన్ని రకాల ప్రయత్నించినా లేవలేదు. యూనిట్ లోని వారందరూ కూడా తమ యథాశక్తి దాన్ని లేపడానికి ప్రయత్నించారు. ఫలితం శూన్యం. చివరగా కస్తూరి శివరావు గారు లేచి దాని దగ్గరకు వెళ్ళి చెవిలో ఏదో చెప్పారు. అంతే ... ఆది వెంటనే చెంగున లేచి కూర్చుంది. అందరికీ ఆశ్చర్యమేసింది. గాడిద చెవిలో ఏం చెప్పారని శివరావు గారిని అడిగారు. దానికాయన
" నేనేం ప్రత్యేకంగా చెప్పలేదు. ' లే బాబూ ! నీకు పుణ్యముంటుంది ' అన్నానంతే ! దానిక్కూడా డబ్బులిచ్చేది నేనేనని తెలిసిపోయినట్లుంది. అందుకే నా మాట విని లేచింది " అన్నారు.  

కస్తూరి శివరావు నటనా జీవితాన్ని మలుపుతిప్పిన ' గుణసుందరి కథ ' లోని ఆయన నటన / నాట్య విన్యాసం .....

Vol. No. 02 Pub. No. 070