మొదటి రెండు మజిలీలు పూర్తి చేసుకుని మూడో మజిలీ పొలిమేరల్లో వుండి....ఈ యాభై నాలుగేళ్ళ జీవితంలో సాధించింది ఏమిటీ అంటే ఆస్తులు, అంతస్తులు కాదు.... భోగభాగ్యాలు అంతకన్నా కాదు..... అంతకంటే విలువైన ....అంతులేని....అపారమైన నిదినిక్షేపాలు. అవే... ఇంటా బయిటా ఆత్మీయుల, స్నేహితుల ఆప్యాయతలు, అనురాగాలు.
అంతర్జాలంలో శిరాకదంబం తో ప్రారంభించి పేస్ బుక్, ట్విట్టర్, తెలుగు పీపుల్ డాట్ కామ్, ఇండ్యారాక్స్, మై స్పేస్, ఫ్యాన్ బాక్స్, వెయిన్, నెట్ లాగ్, జోర్పియా లాంటి అనేక సోషల్ సైట్ల ద్వారా ఎంతోమంది స్నేహితులు ఏర్పడ్డారు. నిజానికి వీరందరికీ ప్రత్యక్షంగా నాతో కంటే నా శిరాకదంబం తోనే అనుబంధం ఎక్కువ. ఆ రాతలు చదివి చాలామంది ఆప్తులుగా మారిపోయారు... అనుబంధం పెంచుకున్నారు.
ఇంతకంటే నాకేమి ఆస్తి కావాలి ? ఈ ఆప్యాయమైన పలకరింపులు చాలవా ? అందుకే ఈ బంధాలు కలకాలం వుండాలని కోరుకుంటూ......
మీ
శి. రా. రావు
ప్రపంచ పర్యావరణ దినోత్సవం సందర్భంగా ఒక విన్నపం... మిత్రులందరూ తమకు వీలైనంతవరకూ పర్యావరణ పరిరక్షణకు కృషి చెయ్యండి... భావి తరాలకు ఆనందకరమైన జీవితాన్నిఅందించండి
ఎన్నెన్నో మెట్లెక్కి అందుబాటులో వున్న శిఖరాలన్నీ అధిరోహించిన బాలు
జీవనగమనంలోనూ అంతే వేగంతో అరవై నాలుగు మేట్లేక్కేసారు బాలు
అయినా ఆయనకు అలుపు లేదు.... రాదు...అందుకే ఆయన బాలు
వయసు ఆయన శరీరానికి కానీ మనసుకు కాదు..ఆయనెప్పుడూ బాలుడే !
...... ఆ ' బాలు 'నికి జన్మదిన శుభాకాంక్షలు
( స్వకీయం : సాధారణంగా రచనలు చేసే తొలిరోజుల్లో మనం రాసింది మనకే నచ్చదు. రాస్తుంటాం.... కొట్టేస్తుంటాం...ఎందుకైనా మంచిదని ఆ కాగితాలు చింపేస్తుంటాం కూడా ! దాని వెనుక మన రచన అద్భుతంగా వుండాలని, దాన్ని చదివిన అందరూ మెచ్చుకోవాలనే ఆకాంక్ష వుంటుంది. అదే మన రాతల్ని మనకే నచ్చకుండా చేస్తుంటుంది. అదొక విచిత్రమైన పరిస్థితి. ఈరోజు నేను అలాంటి పరిస్థితిని ఎదుర్కొన్నాను. ఇలాంటి పరిస్థితి ఇదే మొదటిసారి. బాలుగారి గురించి చక్కటి టపా రాయాలని, ఆయన పాటల్లో మంచివి ఏరి ఓ మాలిక తయారు చెయ్యాలని చాలారోజులనుంచి ప్రణాళిక వేసుకున్నాను. అయితే వేలాదిగా వున్న ఆయన పాటల్లో మంచివి అనిపించేవి కనీసం వందల్లో వున్నాయి. మనకున్న పరిమితులను దృష్టిలో పెట్టుకుంటే అది చాలా పెద్దగా అయ్యేలా వుంది. ఎంపికలోని ఏ పాటా వదలబుద్ధి కాలేదు. అయినా హనుమంతుడి ముందు కుప్పిగంతులా ? ఆయన పాటల్ని ఎంపిక చేసి కూర్చే సాహసమా ? కూర్చి వాటిని మిత్రులకు పరిచయం చెయ్యడమా ? ఆయన పాటల గురించి తెలియనివారెవరు ? ఆయన గురించి రాయడానికి ఎంత ధైర్యం ? ఎవరో రాసిన పాటలు పాడడంలోనే కాదు స్వంతంగా మాటలల్లడంలోనూ ఘనాపాఠీ కదా ! ఆయనపైన మాటల ఆటలా ? ...................... ఇలా ఎంతకీ ఆలోచనలు ఓ కొలిక్కి రాలేదు. సమయం మించిపోతోంది. ఆ గంధర్వుడికి శుభాకాంక్షలందించాలి. అందుకే చంద్రునికో నూలుపోగులా అరవై నాలుగేళ్ళ బాలునికి శుభాకాంక్షలు అందిస్తూ ఏదో తోచిన నాలుగు ముక్కలు రాసి ప్రచురిస్తున్నాను )
ఇది రాసింది వేమన గారి మీదనయినా రాసినవారెవరో మాత్రం తెలుగు సాహిత్య ప్రియులకు బాగా తెలుసు. అక్షరాలతో చదరంగమాడడమే కాదు నిజంగా అంతర్జాతీయ చదరంగ క్రీడ మీద ఓ పుస్తకమే రాసిన ఘనుడాయన. ఆయనే భాగవతుల సదాశివశంకరశాస్త్రి ... అనే ఆరుద్ర.
ఫస్ట్ ఫారం చదివేరోజుల్లోనే.... ఆరోజుల్లో జరుగుతున్న ఎన్నికల్లో అభ్యర్థులు పంచిన కరపత్రాలకు ప్రభావితుడై.... తన స్కూల్లో జరుగుతున్న అవకతవకలను వివరిస్తూ కరపత్రాలు రాసి, పంచి మాస్టారు చేత దెబ్బలు తినడంతో ఆరుద్ర రచనా వ్యాసంగం ఆరంభమైంది.
ఆరుద్ర సృజించని సాహిత్య ప్రక్రియ లేదు. కవితలు, కథలు, నవలలు, నాటకాలు, వ్యాసాలూ, చరిత్రలు, పరిశోధనాత్మక రచనలు, పాటలు, పదాలు, అనువాదాలు ......ఇలా ఎన్నో ఆయన కలం నుంచి జాలువారాయి.
ఆయన ఆరుద్ర కాదు. ఆంధ్ర సాహిత్యాన్ని ఔపోసన పట్టిన అగస్త్యుడు. చిన్నప్పుడే అన్యాయాలకు స్పందించిన ఆరుద్ర రెండవ ప్రపంచ యుద్ధంలో జపాన్ కురిపించిన బాంబులకు భయపడి ప్రాణభయంతో పారిపోతున్న అమాయక ప్రజల గురించి.......
ఓహో ! ఏమిటీ జీవ ప్రవాహం ?
యంత్రాలమాదిరి మనుష్యులు
ప్రాణాలు పిడికెట పెట్టుకుని
గుండెలు చేతబట్టుకుని
బలుసాకును వెతుక్కుంటూ
బతుకుబాటపై కిక్కిరిసి
భుజాలు రాసుకుంటూ ఉన్మాదంతో
పోతున్నారు - రాసుకుంటూ, ఒత్తుకుంటూ
... అంటారు తన ' లోహవిహంగాలు ' కవితలో .
తెలంగాణాలో నైజాం నవాబు తోత్తులైన రజాకర్ల దురాగతాలకు బలై రైల్లో నగ్నంగా తిరుగుతున్న యువతి సవాలును పత్రికల్లో చూసి చలించిపోయి ఆ అన్యాయాలను, అరాచకాలను ఎండగడుతూ ' త్వమేవాహం ' కూడా రాసారు.
శ్రీశ్రీతో బంధుత్వం వల్లనో, ఆయన శిష్యరికం వల్లనో ఆరుద్ర మీద ఆ మహాకవి ప్రభావం స్పష్టంగా కనిపిస్తుంది.
అన్యాయలతోనే కాదు కొంతకాలం గాల్లో కూడా యుద్ధం చేసారు. అంటే ఎయిర్ ఫోర్సు లో పనిచేసారు. అరవై రూపాయిల ఖర్చుతో రామలక్ష్మి గారిని ఆదర్శ వివాహం చేసుకున్నారు.
' ఆనందవాణి ' పత్రికలో పనిచేస్తున్నపుడే ఆయన ' బీదలపాట్లు ' చిత్రంతో చలనచిత్ర రంగంలో ప్రవేశించారు. ఎక్కువగా తొలినాళ్ళలో కే. బి. తిలక్ గారితోనూ, మలిరోజుల్లో బాపురమణ జంటతో కలిసి పనిచేసారు.ఆరుద్ర గారి కలానికి రెండువైపులా పాళీలే ! తిలక్ గారికి ఎంతటి అభ్యుదయ గీతాలు రాసారో, బాపు గారికి అంతటి సాంప్రదాయక గీతాలు రాసారు.
1939 లో చిత్రగుప్త పత్రికలో అచ్చయిన ' నా కలలు ' తో ప్రారంభమయిన ఆయన సాహిత్య ప్రయాణం ' గాయాలు - గేయాలు ', ' ఆరుద్ర కవితలు ', ' ఇంటింటి పద్యాలు ', ' సినీవాలి ', ' కూనలమ్మ పదాలు ', ' త్వమేవాహం ', ' వేమన్న వేదం ' లాంటి ఎన్నో సాహితీ కుసుమాలు వెదజల్లుతూ ' సమగ్రాంధ్ర సాహిత్యం ' వరకూ సాగింది.
1950 లో ' బీదలపాట్లు ' తో మొదలైన ఆరుద్ర గారి చిత్రరంగ ప్రయాణం ఎన్నో చిత్రాలకు మాటలు, పాటలు, కథలు, చిత్రానువాదాలు మొదలైన ఎన్నో ప్రక్రియలతో బాపు గారి ' మిస్టర్ పెళ్ళాం ' దాకా సాగింది.
అక్షరాలతో చదరంగమాడుకునే ఆరుద్ర గారు ఓసారి వనపర్తి కళాశాల వార్షికోత్సవానికి ముఖ్యఅతిథిగా వెళ్ళారు. ఆ కళాశాల ప్రిన్సిపాల్ సరదాగా ఆరుద్ర గారి ' ఇంటింటి పద్యాలు ' బాణీలో ....
ఆరుద్ర గారూ.. మీకూ వున్నారు ఆడపిల్లలు ముగ్గురు అన్యాయంగా అడిపోసుకుంటే అరడజనుకి తగ్గరు
.... అన్నారు. దానికి జవాబుగా ఆరుద్ర గారు ..
అవును ఇప్పటికే ముగ్గురున్నారు అదే పదివేలు అందుకే అవలంబించాను బర్తు కంట్రోలు
.... అన్నారు.
ఈరోజు ఆరుద్రగారి వర్థంతి. ఆ సందర్భంగా ఆయనను, ఆయన సాహితీ సుగంధాలను మరోసారి స్మరించుకుంటూ.....
ఆరుద్ర గారి తోలి చిత్రం ' బీదలపాట్లు ' చిత్రం నుంచి ఎస్. ఎం. సుబ్బయ్యనాయుడు, అశ్వత్థామల స్వరరచనలో నాగయ్య గారు పాడిన పాట ..............
నాకెంతో ఇష్టమయిన ఆరుద్రగారి పాట ' ఉయ్యాల - జంపాల ' చిత్రంలో పెండ్యాల స్వరకల్పనలో ఘంటసాల, సుశీల పాడిన ఈ పాట........
