మొక్కపాటి మాస్టారి కష్టాలు

మొక్కపాటి నరసింహారావు గారు వృత్తీ రీత్యా ఉపాధ్యాయులు. ప్రవృత్తి రీత్యా రచయిత.
ఆయన తన మీదా, తన వృత్తీ మీద వేసుకున్న చలోక్తులెన్నో !
అందులో కొన్ని........

* ఒకసారి ఆయనకు విద్యార్థుల భావనాశక్తి తెలుసుకోవాలనిపించింది. క్లాసులో ఒక కుర్రవాడిని లేపి
" ఒరే అబ్బాయ్ ! ఒక చాకలివాడు తన గాడిదను చావబాదుతుంటే నేను వెళ్లి ఆ గార్దభాన్ని రక్షించాను.అప్పటి నా ప్రవర్తన ఏ రీతిని అనుసరించును ? " అని ప్రశ్న వేశారు.
' బుద్ధ భగవానుని రీతిని ' అని చెప్తాడని ఆయన ఉద్ద్యేశం. కానీ ఆ విద్యార్థి లేచి కొంటెగా
" అప్పటి మీ ప్రవర్తన సోదర భావాన్ని అనుసరించి ఉంది మాస్టారూ ! " అన్నాడు. మొక్కపాటి వారి పరిస్థితి ఊహించుకోండి.

* ఒకరోజున మొక్కపాటి వారు వాళ్ళబ్బాయికి సైన్స్ పాఠం చెబుతున్నారు. అందులో భాగంగా మనుష్యులు కోతులనుంచి వచ్చారని చెప్పారు. వెంటనే ఆ అబ్బాయి వాళ్ళమ్మగారి దగ్గరకు వెళ్లి
" అమ్మా ! మనం కోతులనుండి వచ్చామటగా ! " అన్నాడు. ఆవిడ ' ఛీ ! ఛీ ! అదేం మాట ' అన్నారు.
ఆ అబ్బాయి వదలకుండా
" ఏమో మరి. మన తాతముత్తాతలు కోతులనుండి వచ్చారని నాన్న చెబుతున్నారు " అన్నాడు.
దానికావిడ పరధ్యానంగా " ఏమో నాయినా ! మా తాత ముత్తాతలు మనలాంటి మనుష్యులని మాత్రం తెలుసు. మీ నాన్న తాతముత్తాతల గురించి నాకు తెలియదు " అన్నారు.

* మరోరోజు ఆయన వాళ్లమ్మాయికి లెక్కలు చెబుతున్నారు. ఆయనిచ్చిన లెక్క ' ఒకడు ఒక పనిని మూడు రోజుల్లో పూర్తిచేస్తే మరొకడు అదే పనిని పూర్తి చెయ్యడానికి అయిదు రోజులు తీసుకుంటాడు. ఇద్దరూ కలిస్తే ఆ పనిని ఎన్ని రోజుల్లో పూర్తిచేస్తారు ? '
ఆ అమ్మాయి ఆ లెక్క చెయ్యలేక పోయింది. దాంతో ఆయనకు కోపం వచ్చి ఒక దెబ్బ వేశారు. వెంటనే లోపల్నుంచి కాంతం గారు విసురుగా వచ్చి " ఏమిటండీ వెధవ లెక్కలు. ఒకడు ఒక పనినిమూడురోజుల్లో చక్కగా చెయ్యగలిగి ఉంటే, అయిదు రోజుల దాకా దేకించే మరో వెధవను ఇందులో ఇరికించడం ఏమంత తెలివైన పని ? ఆ ఒక్కడి చేతే పని చేయించుకోకూడదూ ! ఆ ఇద్దర్నీ కలపడమెందుకు ? వాళ్ళిద్దరూ కలిస్తే వప్పందాలు పోతారుగానీ చస్తే ఆ పని పూర్తవుతుందంటారా ? పిచ్చా ఏమన్నానా మీకు ? ఇలాంటి లెక్కలు చెయ్యకపోతే మానె ! పిల్లదాన్ని మాత్రం కొట్టబోకండి " అమాయకంగా అనేసి ఆ అమ్మాయిని లోపలి లాక్కేళ్ళింది.

Vol. No. 01 Pub. No. 141